Նախագծային ուսումնառությունն (project-based learning, ՆՈՒ) իրական, արդիական ու հանրային նշանակության նախագծերի շուրջ կառուցված ուսումնառության նորարարական մոդել է՝ կիրառվող առաջադեմ կրթական աշխարհում: Այն հիմնված է «սովորել անելով» սկզբունքի վրա և, լինելով «Արարատյան բակալավրիատ» կրթական միջազգային ծրագրի կարևոր բաղադրիչներից, «Այբ» դպրոցում ներդրվել է 2015 թ․:
Ո՞րն է այս մոդելի հաջողությունը․
Նախագծային ուսուցումը գիտելիքների ձեռքբերման մեթոդ է՝ իրական խնդիրների վրա աշխատելու միջոցով: Սովորողները մասնակցում են սոցիալական, գիտական կամ մշակութային բնույթի մասշտաբային նախագծերին: ՆՈւ-ն պահանջում է ակտիվ մասնակցություն հարցադրումներին, խնդիրների լուծմանը և արդյունքների ներկայացմանը:
Նպատակը՝ հմտությունների ընդլայնումը և գիտելիքների խորացումն է՝ հիմնված «սովորել գործնականում» կամ «սովորել անելով» սկզբունքի վրա
Ի՞նչ է նախագիծը
Նախագիծը մարդկանց համախումբ է, որն իրականացնում է՝
- թիմային աշխատանք՝ կոնկրետ խնդիր լուծելու կամ նպատակի հասնելու համար,
- բարդ առաջադրանք է, որոնց լուծման համար աշակերտները ներգրավվում են խնդրի ձևակերպման, խնդրի լուծման, որոշումների կայացման և հետազոտական գործընթացների մեջ,
- աշակերտներին այն հնարավորություն է տալիս երկարատև ժամանակահատվածում համեմատականորեն ինքնուրույն աշխատանք կատարել և իրական արդյունքներ գրանցել,
- Նախագիծը մեծամասշտաբ, ռեսուրսատար իրական պահանջներից բխող և ռիսկ պարունակող նախաձեռնություն է,
- Բոլոր նախագծերը պետք է ունենան հստակ սահմանված նպատակներ և նախագիծն իրականացնելու համար անհրաժեշտ ռեսուրսներ:
Ո՞րն է կրթական արդյունքը․
Առարկայական գիտելիքների խորացում և ամրապնդում
Միջառարկայական կապերի ընկալում և կիրառում
Հետազոտական հմտությունների զարգացում
Թվային գրագիտության բարձրացում
Նախագծերի կառավարման հմտությունների ձեռքբերում
Քննադատական մտածողության զարգացում
Ժամանակի կառավարում
Պլանավորման և առաջնահերթությունների սահմանման կարողություն
Խնդիրների լուծման կարողություն
Ստեղծարար մտածողություն
Ի՞նչ հմտություններ և կարողություններ է տալիս․
- Ինքնավստահության և ինքնաարդյունավետության բարձրացում
- Ինքնավերլուծության և ինքնագնահատման հմտությունների բարելավում
- Թիմային աշխատանքի և առաջնորդության հմտությունների զարգացում
- Հանրային ելույթների և ներկայացումների հմտությունների կատարելագործում, հաղորդակցական
- ունակությունների բարելավում
- Սոցիալական պատասխանատվության զգացողության ձևավորում
- Գործարար մտածողության և նախաձեռնողականության խթանում
- Մշակութային իրազեկվածության բարձրացում
Ծրագիրը՝ թվերով
2015-2024 թվականներին նախագծային ուսումնառության շրջանակում գործել է 34 նախագծային ակումբ: Նախագծային կրթություն է ստացել 800-ից ավելի աշակերտ: 2023-2024 ուս. տարում նախագծային ուսումնառության շրջանակում գործել է 8 նախագծային ակումբ, իրականացվել՝ 13 նախագիծ, նախագծային ուսումնառություն ստացան 102 աշակերտ՝ 11-րդ դասարանի 52 և 11-րդ դասարանի 50 աշակերտ, 12 շրջանավարտ:
2024-2025 ուսումնական տարում ձևավորվել է 10 նախագծային ակումբ:
Որպես նախագծավարներ՝ ոլորտի հեղինակավոր մասնագետների ներգրավմամբ աշակերտներն ուսումնասիրում և շատ հետաքրքիր նախագծեր են իրականացնում ամենատարբեր ոլորտներում՝ արվեստից մինչև տվյալների վերլուծություն, բնագիտությունից մինչև ուրբանիզմ, ինժեներիա, բիզնես, մեդիա, ծրագրավորում:
Ինչո՞ւ աջակցել այս մոդելի զարգացմանը
Նախագծային ակումբներում ստացած գիտելիքներն ու հմտությունները ոչ միայն երեխաներին են զարգացնում ու դարձնում նրանց մրցունակ, այլ լուծում են համայնքային ու հանրային նշանակության ամենատարբեր խնդիրներ: Նախագծային ուսումնառության շնորհիվ աշակերտները, փորձելով սեփական ուժերը այս կամ այն ոլորտում, կողմնորոշվում են նաև ապագա մասնագիտության ընտրության հարցում:
Այս ակումբներում ստեղծված բազմաթիվ նախագծեր արժանացել են միջազգային ու տեղական մրցանակների:
Սա մեր ապագայի կրթությունն է, որը պետք է կառուցենք այսօր: